मलेसियामा श्रमिकको तलब बढ्छ?

मलेसियामा काम गर्ने नेपालीको तलब बढ्ने खबर सुन्नुभएको छ? प्रधानमन्त्री अनवर इब्राहिमले कम्पनीको नाफा र उत्पादकत्व बढ्दा पनि धेरै श्रमिकको तलब कम रहेको भन्दै आगामी बजेटमा यसलाई सम्बोधन गर्ने बताएका छन्। तर सरकारले नयाँ न्यूनतम तलब कति हुने वा सबै श्रमिकको तलब कहिलेदेखि बढ्ने भन्ने घोषणा गरिसकेको छैन।

सेप्टेम्बर २६ मा बोल्दै इब्राहिमले श्रमिकको तलब कम्पनीको उत्पादकत्वसँग मेल खानुपर्ने बताएका हुन्। मलेसियाको २०२७ को बजेट अक्टोबर ९, २०२६ मा संसदमा पेश हुने कार्यक्रम छ। तलबसम्बन्धी ठोस कदम के हुन्छ भन्ने कुरा बजेट आएपछि मात्रै स्पष्ट हुनेछ।

अहिले न्यूनतम तलब कति छ?

मलेसियामा हाल लागू न्यूनतम मासिक तलब १,७०० रिंगिट हो। मलेसियाको श्रम विभागका अनुसार न्यूनतम तलबको व्यवस्था विदेशी श्रमिकलाई पनि लागू हुन्छ। प्रधानमन्त्रीले सरकारी स्वामित्वका लगानी कम्पनीहरूअन्तर्गतका संस्थामा ३,१०० रिंगिट सम्मको न्यूनतम तलबको उदाहरण पनि दिएका छन्। यो रकम मलेसियाका सबै कम्पनीमा काम गर्ने श्रमिकको नयाँ न्यूनतम तलब होइन। निजी क्षेत्रको हाल लागू न्यूनतम दर र ती संस्थाको व्यवस्था फरक हुन्।

नेपाली श्रमिकलाई यसले के असर गर्न सक्छ?

मलेसियामा सुरक्षा, निर्माण, सेवा र अन्य क्षेत्रमा नेपाली काम गर्छन्। आगामी बजेटमा तलबसम्बन्धी नयाँ व्यवस्था आए त्यसको दायरा के हो—कुन कम्पनी र कुन श्रमिकलाई लागू हुन्छ, कहिलेदेखि लागू हुन्छ-भन्ने कुरा महत्त्वपूर्ण हुनेछ।

अहिले नै “सबैको तलब बढ्यो” भनेर नयाँ हिसाब गर्न मिल्दैन। बजेटको घोषणा आएपछि त्यसको आधिकारिक विवरण र लागू हुने मिति हेर्नुपर्छ।

न्यूनतमभन्दा कम तलब पाइरहनुभएको छ भने?

आफ्नो रोजगार सम्झौतामा लेखिएको आधारभूत तलब, मासिक तलब पर्ची र बैंकमा जम्मा भएको रकम जाँच्नुहोस्। ओभरटाइम वा अन्य भत्तालाई आधारभूत तलबसँग एउटै रकम मानेर नहेर्नुहोस्। रकममा फरक देखिए कम्पनीसँग लिखित रूपमा सोध्नुहोस् र उपलब्ध कागजात सुरक्षित राख्नुहोस्।

प्रायद्वीपीय मलेसियाको श्रम विभाग JTKSM ले ढिलो तलब, न्यूनतम तलब पालना नभएको र रोजगार सम्झौतासम्बन्धी उजुरी हेर्ने जनाएको छ। समस्या समाधान नभए सम्बन्धित श्रम कार्यालयमा उजुरीबारे जानकारी लिन सकिन्छ।

अहिलेलाई यति बुझौं है साथीहरु : प्रधानमन्त्रीले श्रमिकको तलब सुधार्ने कदम बजेटमा ल्याउने बताएका छन्। नयाँ तलबदर र त्यसले नेपाली श्रमिकलाई कसरी समेट्छ भन्ने निर्णय सार्वजनिक हुन बाँकी छ।

(तल उल्लेखित स्रोतहरुद्धारा प्रकासित खबरहरुका आधारमा तयार पारिएको हो ।)

स्रोत: मलेसियाली समाचार संस्था Bernama: प्रधानमन्त्रीको घोषणा · मलेसियाको श्रम विभाग: विदेशी श्रमिक र न्यूनतम तलब · JTKSM: श्रम उजुरी